Demir ýollaryň hyzmatdaşlygy guramasynyň maslahatyna gatnaşyjylar «Türkmendemirýollary» agentliginde guralan sergini synladylar

Şu gün paýtagtymyzda badalga berlen Demir ýollaryň hyzmatdaşlygy guramasynyň agza döwletleriniň demir ýol ulaglary edaralarynyň ýolbaşçylarynyň we jogapkär wekilleriniň maslahatynyň XXXVIII mejlisine gatnaşyjylar günüň ahyrynda Türkmenistanyň Ministrler Kabinetiniň ýanyndaky Ulag we kommunikasiýalar agentliginiň «Türkmendemirýollary» agentliginiň binasynda guralan sergä tomaşa etdiler.

Bu ýerde Türkmenistanyň demir ýol pudagynyň gazananlary giňişleýin görkezildi. Ajaýyp sergide görkezilen gymmatlyklar Demir ýollaryň hyzmatdaşlygy guramasynyň agza döwletleriniň demir ýol ulaglary edaralarynyň ýolbaşçylarynyň we jogapkär wekilleriniň maslahatynyň XXXVIII mejlisine gatnaşyjylarda ýatdan çykmajak täsirleri döretdi. Olar ýurdumyzyň ulag-logistika ulgamyna, şol sanda demir ýol ulgamynda ýetilen sepgitlere ýokary baha berdiler.

Ýeri gelende bellesek, Türkmenistan 1994-nji ýyldan bäri Demir ýollaryň hyzmatdaşlygy guramasynyň agzasy bolmak bilen, milli derejede demir ýol ulgamy düzümleriniň sazlaşykly ösmegi we sebit derejesinde utgaşykly ulag syýasatynyň amala aşyrylmagy esasynda halkara üstaşyr ýükleri daşamagyň wajyp ugruny özünde jemleýär. Ýurdumyz guramanyň binýadynda maglumat tehnologiýalaryny alyşmak, ylmy-tehniki we ekologik meseleler babatda netijeli gatnaşyklary ýola goýdy.