Türkmenistanyň zenanlary halkara baýramy bilen gutlady

Türkmenistanyň Prezidenti Serdar Berdimuhamedow ähli eneleri we gelin-gyzlary Halkara zenanlar güni mynasybetli gutlady. Gutlag haty şu gün Türkenistanyň resmi metbugatynda çap edildi.

"Maşgalanyň sütüni hökmünde ýokary ahlaklylygyň nusgasy bolan eziz enelerimiziň mertebesini belentde tutmak türkmen halkynyň gadymy döwürlerden gözbaş alyp gaýdýan milli ýörelgesidir. Watana, il-güne, peder ojagyna wepaly, lebzi halal, zähmetsöýer gelin-gyzlarymyz biziň abraý-mertebämizdir" diýlip, hatda bellenýär.

Prezident Serdar Berdimuhamedow türkmen halkynyň kemala gelmeginde we abraýynyň belende göterilmeginde uly ähmiýetli ornuny bolandygyny belledi.

"Biz mähriban enelerimiziň ösüp gelýän nesillerimizde milli buýsanjy, belent ynsanperwer häsiýetleri terbiýelemekde bitirýän hyzmatyna ýokary baha berýäris. Maddy we ruhy gymmatlyklarymyzy, nesilden-nesle geçirip gelýän däplerimizi dowam etdirmek bilen, zenanlarymyzyň döwlet, häkimiýet we dolandyryş edaralarynda, ykdysadyýetimiziň dürli pudaklarynda, ylym, bilim, medeniýet we saglygy goraýyş ulgamlarynda giňden amala aşyrýan özgertmelerimiziň durmuşa geçirilmegi ugrunda çekýän yhlasly hem-de netijeli zähmetine çäksiz buýsanýarys" diýip, döwlet Baştutany belleýär.

"Sizi Halkara zenanlar güni bilen ýene-de bir gezek tüýs ýürekden gutlaýaryn. Siziň her biriňize berk jan saglyk, maşgala ojaklaryňyzda abadançylyk, bagtyýarlyk, durmuşyňyzyň bolsa mylaýym bahar pasly ýaly elmydama owadan we nurana bolmagyny arzuw edýärin" diýlip, Prezident Serdar Berdimuhamedowyň gutlag hatynda bellenýär.