1-nji maýda «Demirýollary» açyk görnüşli paýdarlar jemgyýetiniň edara binasynda şanly Garaşsyzlygymyzyň 35 ýyllygyna bagyşlanyp, Mary — Serhetabat demir ýolunyň düýpli abatlaýyş işlerinde göreldeli zähmet çeken öňdebaryjy işgärlerini sylaglamak hem-de demir ýol ulaglary pudagynda ýetilen sepgitler, alnyp barylýan işler hakynda demirýolçularyň arasynda aýdym-sazly, wagyz-nesihat çäresi geçirildi.

Çäräniň dowamynda Gahryman Arkadagymyzyň, Arkadagly Gahryman Serdarymyzyň öňden görüjilikli taýsyz tagallalary netijesinde pudagyň maddy-enjamlaýyn binýadyny berkden tutup, innowasiýalary ornaşdyrmak, başarjaň, ylymly-bilimli ökde hünärmenleri ýetişdirmek babatda hemmetaraplaýyn goldawlary bermek boýunça yzygiderli işleriň durmuşa geçirilýändigi aýratyn nygtaldy.

Çäräniň ahyrynda göreldeli zähmet çeken işgärlere Hormat hatlary we gymmatbahaly sowgatlar gowşuryldy.