Türkmenistanyň çäginden geçjek konteýner otlusy Hindistandan Gazagystana tarap ýola düşdi

Halkara ulag geçelgelerini giňeltmek maksatnamasynyň çäklerinde Hindistan bilen Gazagystany birleşdirýän ilkinji konteýner otlusy herekete başlady. Bu barada Özbegistanyň demir ýollary habar berýär.

Taslama sebitdäki üç sant esasy ulag-logistika operatorynyň gatnaşmagynda bilen amala aşyryldy. Olar Özbegistanyň resmi demir ýol ekspeditor kompaniýasy bolan «Uztemirýulkontýener» paýdarlar jemgyýeti, Türkmenistanyň Ulag-logistika merkezi (TULM) hem-de Gazagystanyň iri logistika terminal operatory bolan «Kedentranssowýes» paýdarlar jemgyýetidir.

Otlynyň düzüminde 12 sany 20 futluk konteýner bar. Otly Hindistanyň Mundra portundan ugrap, Gazagystanyň Sorokoýa demir ýol bekedine tarap hereket edýär.

Surat: Newscentralasia.net

Bu ugur Eýran, Türkmenistan we Özbegistan ýaly ýurtlaryň çäginden geçýär. Umuman, otly 5 885 kilometr ýol geçýär. Şonuň 1 585 kilometri deňiz arkaly, 4 300 kilometri bolsa demir ýol arkaly geçilýär.

Bellenilişi ýaly, bu ulag geçelgesi mundan öň hem Hindistandan Özbegistana konteýner daşamak üçin Munda – Sergeli ugry boýunça üstünlikli ulanylypdy. Emma indi onuň gerimi ilkinji gezek Gazagystana çenli giňeldildi.

«Uztemirýulkontýener» PJ-niň ýolbaşçysy M.K.Mirhamidowyň belleýşi ýaly, kompaniýa Hindistan bilen Merkezi Aziýa ýurtlarynyň arasyndaky multimodal geçelge boýunça konteýner otlularyny yzygiderli gatnatmagy meýilleşdirýär. Bu bolsa sebitdäki söwda gatnaşyklaryny ep-esli pugtalandyryp, eksport we import mümkinçiliklerini giňelder.