Gurbanguly Berdimuhamedow Masud Pezeşkiany Aşgabatda geçiriljek halkara foruma çagyrdy

Türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedow Eýran Yslam Respublikasynyň Prezidenti Masud Pezeşkiany şu ýylyň dekabrynda Aşgabatda geçiriljek halkara liderler forumyna we baýramçylyk çärelerine gatnaşmaga çagyrdy hem-de dostlukly ýurduň Prezidentiniň gatnaşmagynyň bu çäreleri üstünlikli geçirmäge uly goşant boljakdygyny nygtady. "Watan" habarlar gepleşiginde habar berlişi ýaly, Türkmenistanyň Halk Maslahatynyň Başlygy çakylygy şu gün Eýran Yslam Respublikasynyň Prezidenti Masud Pezeşkian bilen bolan telefon arkaly söhbetdeşliginiň barşynda beýan etdi.

Türkmen halkynyň Milli Lideri ýakyn wagtda resmi çakylyk hatynyň iberiljekdigini aýdyp, Türkmenistanyň Halkara parahatçylyk we ynanyşmak ýyly babatdaky tagallalaryny Eýranyň hem goldajakdygyna berk ynam bildirdi hem-de bu ugurda bilelikdäki çäreleri geçirmek barada maslahatlaşmagy teklip etdi.

Söhbetdeşligiň dowamynda bellenilişi ýaly, şu ýyl Türkmenistan üçin şanly wakalara beslenýär. BMG-niň Baş Assambleýasy Türkmenistanyň teklibi bilen 2025-nji ýyly "Halkara parahatçylyk we ynanyşmak ýyly" diýip yglan etmek barada Kararnamany kabul etdi.

Gahryman Arkadag Türkmenistanyň başlangyjyny doly goldandygy we bu Kararnamanyň awtordaşlarynyň biri bolup çykyş edendigi üçin eýran tarapyna minnetdarlyk bildirip, öz gezeginde, Türkmenistanyň hem Eýranyň halkara giňişlikdäki işlerine uly hormat goýýandygyny we olary goldaýandygyny aýtdy.

Bellenilişi ýaly, 2025-nji ýylyň 12-nji dekabrynda Aşgabat şäherinde geçiriljek Halkara parahatçylyk we ynanyşmak forumy şu ýylyň dowamynda geçiriljek iň esasy çäreleriň biri bolar. Türkmen halkynyň Milli Lideri şeýle hem forumyň geçirilýän gününde Türkmenistanyň hemişelik Bitaraplygynyň 30 ýyllygynyň belleniljekdigini aýtdy.