Türkmenistan Owganystan bilen demirýol ulgamynda bilelikdäki taslamalary maslahatlaşdy

“Türkmendemirýollary” agentliginiň başlygy Azat Atamyradowyň ýolbaşçylygyndaky wekiliýetiň Owganystana amala aşyran iş saparynyň barşynda goňşy döwletiň demirýol infrastrukturalaryny ösdürmegiň taslamalary ara alnyp maslahatlaşyldy diýip, ORIENT agentligi habar berýär.

Bellenilişi ýaly, Hyrat welaýatynyň ýolbaşçylary bilen geçirilen duşuşykda ammarlar toplumynyň we Turgundy-Hyrat demir ýolunyň Turgundy-Sanabar böleginiň birinji tapgyrynyň gurluşygynyň meýilnamalaryna garaldy. Taraplar Owganystanyň ykdysady durnuklylygyny gazanmakda we Hyrat welaýatynda senagaty ösdürmekde bu taslamalaryň möhüm ähmiýetini bellediler.

Owganystanyň jemgyýetçilik işleri ministriniň orunbasary Baht-ur-Rahman Şarafat bilen geçirilen duşuşykda iki ýurduň arasyndaky demir ýol aragatnaşygy, şeýle hem Turgundy bekedinde ammar toplumynyň - "guryýer portunyň" gurluşygy boýunça Özara düşünişmek hakynda Ähtnamanyň taslamasyny ylalaşmak, şeýle hem Turgundy-Sanabar böleginiň birinji tapgyry boýunça bilelikdäki işleriň meseleleri maslahatlaşyldy.

Owganystanyň Demir ýollar müdirliginiň ýolbaşçylary hem-de Ministrler Kabinetiniň Ykdysady meseleler boýunça orunbasary bilen geçirilen duşuşykda möhletleri gysgaltmak we iki ýurduň arasyndaky ýük gatnawlarynyň möçberlerini artdyrmak üçin bilelikdäki taslamalary möhüm ähmiýeti bellenildi.

Taraplar awgust aýynda Aşgabatda Ähtnama we bilelikdäki meýilnama gol çekmek, şeýle hem Türkmenistan bilen Owganystanyň arasyndaky ýük gatnawlarynyň möçberini artdyrmak üçin iş toparyny döretmek hakynda ylalaşyk gazandylar.